पोखरा, १० साउन/ पोखरा विश्वविद्यालयले छात्रवृत्तिमा अध्ययन गर्न चाहने विद्यार्थीहरूका लागि ठूलो सङ्ख्यामा दरखास्त आव्हान गरेको छ । अनलाइन विधिबाट दरखास्त दिनसक्ने गरी विश्वविद्यालयले बुधबार सूचना प्रकाशित गरेको हो । विश्वविद्यालयमा सञ्चालित स्नातकतहका विभिन्न कार्यक्रममा १ हजार २ सय ९९ कोटाका लागि छात्रवृत्ति खुलाएको हो ।
विश्वविद्यालयले विज्ञान तथा प्रविधि सङ्काय अन्तर्गत सञ्चालित बिइ कम्प्यूटर, बिइ आर्किटेक्चर, बिइ सिभिल, बिइ सिभिल (रूरल), बिइ इलेक्ट्रिकल एण्ड इलेक्ट्रोनिक्स, बिइ इलेक्ट्रोनिक्स एण्ड कम्यूनिकेशन, बिइ सफ्टवेयर, बिइ आइटी र बिइ सिभिल डिप्लोमा होल्डर्स, बिसिए र बिएस्सी इन्भायोरोन्मेन्ट कार्यक्रममा ४ सय ९० सिट रहेको छ । त्यसै गरी व्यवस्थापन सङ्काय अन्तर्गत सञ्चालित बिबिए, बिबिए (फाइनान्स), बिसिएस आइटी, बिएचसिएम, बिएचएम र बिबिए टीटी कार्यक्रममा कुल ७ सय ७० सिट रहेको छ ।
मानविकी तथा सामाजिक शास्त्र सङ्काय अन्तर्गत सञ्चालित बिडेभ्स, बेड, बिइसिएस र बिएएलएलबी कार्यक्रममा कुल ३९ सिटका लागि दरखास्त आव्हान गरेको छ । विश्वविद्यालयले हालै विश्वविद्यालयका विभिन्न महाविद्यालयहरूमा कार्यक्रम र सेक्सन थप गरेकोले उल्लेखित छात्रवृत्ति कोटा अझै बढ्ने देखिएको विश्वविद्यालयका सूचना अधिकारी लोकनाथ ढकालले बताए । विश्वविद्यालयले आङ्गिक महाविद्यालयमा कुल विद्यार्थी भर्ना कोटाको २० प्रतिशत र सम्बन्धन प्राप्त महाविद्यालयहरूमा कुल विद्यार्थी भर्ना कोटाको १० प्रतिशतका दरले छात्रवृत्ति उपलब्ध गराउँदै आएको उनले बताए ।
पोखरा विश्वविद्यालय छात्रवृत्ति नियमावली २०६५ अनुसार विश्वविद्यालयले स्थानीय छात्रवृत्ति र पोखरा विश्वविद्यालयमा कार्यरत शिक्षक तथा कर्मचारी सन्तति छात्रवृत्तिको कोटा बाहेक ६० प्रतिशत कोटा खुला र ४० प्रतिशत कोटा अपाङ्ग, सहिद तथा जनआन्दोलन घाइते पीडित, दुर्गम, दलित, जनजाति र मधेसी समुदायलाई सुरक्षित गरेको छ । जसमध्ये खुला र आरक्षित दुवै प्रकारका छात्रवृत्ति कोटामा महिलाहरूका लागि ५०÷५० प्रतिशत छात्रवृत्ति कोटा सुरक्षित रहनेछ ।
विश्वविद्यालयले उपलब्ध गराउने निःशुल्क छात्रवृत्ति कोटामा नियमानुसार सार्वजनिक विद्यालयमा कम्तीमा कक्षा ६ देखि कक्षा १० सम्म अध्ययन गरी एसईई वा एसएलसी उत्तीर्ण गरेका र छात्रवृत्ति छनौंट प्रवेश परीक्षामा समेत सफल भएका उम्मेदवारहरूलाई तेस्रो चरणको छात्रवृत्ति वितरण गरिसकेपछि पनि कोटा रिक्त रहन गएमा सार्वजनिक विद्यालय (कक्षा ६ देखि १० सम्म अध्ययन गरेका बाहेक) र संस्थागत विद्यालयमा अध्ययन गरि एसईई वा एसएलसी उत्तीर्ण गरेका उम्मेदवारहरूलाई समेत योग्यताक्रमका आधारमा छात्रवृत्ति उपलब्ध गराइने उनले बताए ।
विश्वविद्यालयले छात्रवृत्तिका लागि २०८१ श्रावण ९ गतेदेखि श्रावण ३० गते बुधबारसम्म अनलाइन मार्फत दरखास्त दिन सक्ने व्यवस्था गरेको छ । छात्रवृत्तिका लागि विज्ञान तथा प्रविधि सङ्कायका कार्यक्रमको समूह क का लागि २०८१ भाद्र ७ गते बिहान ८ बजेदेखि ११ बजेसम्म र समुह ख का लागि सोही दिन दिउँसो २ बजेदेखि ५ बजेसम्म परीक्षा तोकिएको छ ।
त्यस्तै व्यवस्थापन सङ्कायका कार्यक्रमको लागि २०८१ भाद्र ८ गते बिहान ८ बजेदेखि ११ बजेसम्म र मानविकी तथा सामाजिक शास्त्र सङ्कायका कार्यक्रमका लागि सोही दिन दिउँसो २ बजेदेखि ५ बजेसम्म परीक्षा तोकिएको छ । पोखार–३०, ढुङ्गेपाटनमा अवस्थित विश्वविद्यालयको प्राज्ञिक कम्प्लेक्समा परीक्षा सञ्चालन हुनेछ ।
