पोखरा-पोखरा महानगरपालिका वडा नम्बर ३२ को कार्यालय उच्च अदालत पोखराका दुई दुईवटा आदेश विरुद्ध उभिएको पाईएको छ । सो वडाकी रमा राय थापाको नागरिकता सिफारिस सम्बन्धमा वडा अध्यक्ष अक्कल बहादुर कार्की उच्च अदालतको आदेश विपरित उभिएका हुन् ।
रमाले नागरिकताको सिफारिस लिन जाँदा बाबुको थर राय र आमाको थर थापा भएकोले उनले सिफारिस दिन नमानेको सम्बन्धित पक्षले बताएको छ । रमाका बाबु शैवल राय (राजीव) आमा रुक्मिणी थापा भएकाले सिफारिस दिन आनकानी गरेको आरोप पिडित पक्षले लगाएको छ । उच्च अदालत पोखराले २०८० असार १९ गते रमा रायलाई आमा रुक्मिणी थापाको नामबाट नागरिकता दिनु भनेर फैसला गरेको थियो । उच्च अदालत पोखराका न्यायधीश उज्वल शुक्ल र ऋषि राजभण्डारीको सँयुक्त ईजलासले उक्त आदेश दिएको थियो ।
सो आदेशका विरुद्ध पुन परेको पुनरावेदनप्रति फेरी माघ २३ गते निर्मला पौडेल भट्टराई र उमेश कोईरालाको ईजलासले असारकै आदेशलाई सदर गर्दै रमालाई आमाको नामबाट नागरिकता दिन आदेश गरेको थियो ।
रमालाई आमाको नामबाट नागरिकता दिन जिल्ला सरकारी वकिल कार्यालयल कास्कीले पनि यही असोज ८ गते रमालाई आमाको नामबाट नागरिकता दिन कुनै बाधा नपर्ने राय दिएको थियो ।
उच्च अदालतका दुई दुईवटा आदेश र जिल्ला सरकारी वकिलको कार्यालयले नागरिकताको सिफारिस दिन राय दिएपनि वडा अध्यक्ष कार्कीले भने विभिन्न बहाना बनाएर सिफारिस दिन टार्ने गरेको पिडित पक्षको गुनासो छ । नागरिकताको लागि सिफारिस लिन पटक पटक जाँदा पनि आलटाल गरेकोले पिडित पक्ष आक्रोशित बनेको छ । कार्कीले दिएको हैरानीका कारण केही समय अघि वडा कार्यालयमा झडप समेत भएको थियो ।
तर वडा अध्यक्ष कार्कीले भने बाबुको ३ पुस्ते भएतापनि र आमाको थर थापा भएको तथा छोरीको थर राय भएकाले सिफारिस दिन नमिलेको तर्क गरेका छन् । ‘छोरीको थर राय छ आमाको थर थापा छ, अब कसरी आमाको नामबाट नागरिकताको सिफारिस दिन मिल्छ त ?’ उनले प्रश्न गरे ।
सरकारकी कामकाजको लागि रमालाई तत्काल नागरिकताको आवश्यकता छ । नागरिकता नभई कुनै पनि सरकारी कामकाज र सेवा सुबिधा नपाईने भएकोले उनी आफ्नै देशमा पनि अनागरिक भएको महसुस गरेकी छिन् । उनका बाबु राजीव विगत २१ वर्षदेखि परिवारको सम्पर्कमा छैनन् ।
