कास्की — त्रिभुवन विश्वविद्यालयअन्तर्गतका क्याम्पसहरूमा चैत ५ र १० गते सम्पन्न स्वतन्त्र विद्यार्थी युनियनको निर्वाचनमा कास्की जिल्लाका कुनै पनि क्याम्पसमा सफलता हासिल गर्न नसकेकोमा नेपाल विद्यार्थी संघ (नेविसंघ) का केन्द्रीय सदस्य महादेव गिरिले गम्भीर असन्तुष्टि व्यक्त गरेका छन्।
कास्की कांग्रेसकै सभापति किशोर दत्त बरालले पार्टीको राजनीति क्याम्पसहरूमा गर्नु नहुने भन्दै स्वतन्त्र उम्मेदवारको पक्षमा भोट मागेको आरोप लगाएका छन्। यसले नेपाल विद्यार्थी संघको अस्तित्व समाप्त पार्ने प्रयास भएको र यसप्रति गहिरो चिन्ता व्यक्त गरिएको छ।
गिरिले कास्की कांग्रेसका सभापति बरालको यस कार्यलाई नैतिकताविपरीत भन्दै तत्काल राजीनामा दिनुपर्ने माग गरेका छन्। साथै, नेविसंघ कास्कीका पूर्व जिल्ला सभापति, पूर्व केन्द्रीय सदस्यहरू र विभिन्न जिम्मेवारीमा रहेका पूर्व नेताहरूसँग समन्वय गरेर संगठनलाई ठूलो दुर्घटनाबाट जोगाउन आग्रह गरेका छन्।
उनले संगठनको पराजयमा आफ्नो पनि कमजोरी रहेको स्वीकार्दै भविष्यमा यस्ता गल्ती नदोहोऱ्याउन सबै पक्षलाई सचेत गराएका छन्।
