✍️ अजय क्षेत्री
पोखरा नयाँबजारमा रहेको गण्डकी मेडिकल कलेजलाई स्थानान्तरण गरिने भएको छ । पोखरा २७, रिठ्ठेपानीमा नयाँ भवन बनाएर मेडिकल कलेज स्थानान्तरण गर्न लागिएको हो । रिठ्ठेपानीमा शैक्षिक भवन र अर्घौंमा मेडिकल कलेज निर्माण सुरु गरिएकोमा दुवै भवनको बुधबार गण्डकी मेडिकल कलेज टिचिङ हस्पिटल तथा रिसर्च सेन्टर अध्यक्ष खुमाप्रसाद अर्यालले शिलान्यास गरेका छन ।
उनले पोखरामा बढ्दै गएको जनघनत्व मध्यनजर गरेर लेखनाथमा कलेज स्थानान्तरण गर्न लागिएको बताए । ‘हामी नयाँबजारबाट रिठ्ठेपानीमा कलेज सार्न लागेका छौं । नयाँबजारमा अब पठनपाठन हुँदैन । अस्पताललाई अरु व्यवस्थित गरेर चलाउँछौं,’ उनले भने, ‘टिचिङ अस्पताल र शैक्षिक भवन पूर्ण रुपमा लेखनाथ सार्न लागिएको हो । नयाँबजारमा सिटी अस्पताल मात्रै चल्छ छ ।’
उनले गण्डकी मेडिकल कलेज गण्डकी क्षेत्रकै अग्रणी र जिम्मेवार संस्था रहेको दाबी गरे । ‘शैक्षिक र स्वास्थ्यका हिसाबले गण्डकी कमजोर नै छ । यहाँका दूरदराजका बिरामीले असाध्य रोगको उपचारका लागि काठमाडौं र विदेश धाउनुपर्ने बाध्यता नभएको होइन,’ अघि भने, ‘हाम्रो ग्रुपले बिस्तारै यसको अन्त्य गर्दैछ । कलेजलाई अझै बिस्तार गर्न गइरहेका छौं र अत्याधुनिक प्रविधिबाट उपचार गर्ने गरी प्रक्रिया अघि बढाएका छौं ।’
नेपालको मेडिकल शिक्षा विश्वमै अब्बल रहेको उनले बताए । ‘नेपालको चिकित्सा शिक्षा विश्वमा अब्बल नै छ तर सरकारी नीति व्यवहारिक छैन । सरकारी नीति सुधार भयो भने भविष्य अझै राम्रो छ,’ अर्यालले थपे, ‘समग्र पश्चिम नेपालको स्वास्थ्य सेवा सुरक्षित गर्ने पहलमा हाम्रो ग्रुप लागेको छ । मेडिकल एजुकेसन र स्वास्थ्य सेवामा केन्द्रित छौं ।’
अर्यालसहित सहभागी रहेका सञ्जीवनी ग्रुपले भैरहवाबाट पोखरामा मेडिकल कलेज सञ्चालन गर्न थालेको हो । केही समयअघि नेपालगञ्ज मेडिकल कलेज र कोहलपुर अस्पतालमा पनि उपस्थिति जनाएको थियो । नयाँ बन्ने अस्पताल भवन ७ सय ५० बेडको बन्नेछ । हाल ५ सय ५० बेडको स्वीकृति रहेको अस्पतालमा शैय्या थप गर्न प्रक्रिया अघि बढाइएको अर्यालले जानकारी दिए । भवन निर्माणमा करिब ३ अर्ब लागत अनुमान गरिएको छ । सोही ठाउँ नजिकै अत्याधुनिक शैक्षिक भवन पनि शिलान्यास भएको छ । भवन १ अर्ब लागतमा २ वर्षभित्र निर्माण सम्पन्न गर्ने प्रमुख कार्यकारी अधिकृत डा. रवीन्द्रप्रसाद श्रेष्ठले जानकारी दिए ।
२०६४ सालमा स्थापना भएको टिचिङ अस्पतालबाट हालसम्म एमबिबिएस र बिडिएसतर्फ ६ सय ५९ जना र नर्सिङ तथा एलाइड साइन्सेजतर्फ २ सय २१ जना, एमडी, एमएस तथा एमपिएचमा ५० जना दक्ष जनशक्ति उत्पादन भइसकेका छन् । संस्थामा प्रत्यक्ष र अप्रत्यक्ष रुपमा १ हजार २ सयभन्दा बढीले रोजगारी पाएका छन् भने अस्पतालबाट बर्सेनि २ लाख बिरामीले उपचार सेवा लिएका अस्पताल प्रशासनले जनाएको छ । हालसम्म अस्पतालको भौतिक संरचनामा मात्रै ५ अर्बभन्दा बढी लगानी गरिसकेको श्रेष्ठले बताए । अस्पतालबाट सरकारले सञ्चालन गरेका निशुल्क सेवाहरु, भूतपूर्व भारतीय सैनिकको इसिएचएस, कर्मचारी सञ्चयकोषका सञ्चयकर्तालाई विशेष छुट दिइएको र विभिन्न संघसंस्थासँग सहकार्यमा सुलभ सुविधा उपलव्ध गराइएको उनले बताए ।
अस्पतालले नेपाल पत्रकार महासंघ, कास्कीसँग पनि सहकार्य गरेको छ । पत्रकारलाई विशेष छुटको व्यवस्था गरिएको छ । अस्पतालबाट ब्लड बैंक, एमआरआई, सिटी स्क्यान, क्याथ ल्याबजस्ता सेवा प्रदान भइरहेको प्रमुख कार्यकारी अधिकृत डा. श्रेष्ठले जानकारी दिए ।
