पोखरा– त्रिभुवन विश्वविद्यालयअन्तर्गत पृथ्वीनारायण क्याम्पसमा स्ववियु निर्वाचन २०८१ को मतदान प्रकृया अवरुद्ध पारिएको भन्दै अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु) पृथ्वीनारायण क्याम्पस कमिटीले कडा आपत्ति जनाएको छ।
अनेरास्ववियुले एक प्रेस विज्ञप्ति जारी गर्दै त्रिवि निर्वाचन समितिले पूर्व निर्धारित तालिका अनुसार चैत्र ५ गते स्ववियु निर्वाचन सम्पन्न गराउनुपर्नेमा नियोजित रूपमा त्रुटि गराएर मतदान बिथोल्ने र निर्वाचन प्रक्रिया स्थगित गर्ने कार्यप्रति गम्भीर ध्यानाकर्षण भएको जनाएको छ।
विज्ञप्तिमा क्याम्पस प्रशासनले चुनाव स्थगित गर्ने बहानामा क्याम्पस गेटमा तालाबन्दी गर्दै प्रहरीको आडमा विद्यार्थीहरूलाई परीक्षा फारम भर्न रोक लगाउने, पठनपाठनमा अवरोध गर्ने तथा स्ववियु निर्वाचनको गरिमामा ठेस पुर्याउने कार्य गरेको आरोप लगाइएको छ।
अनेरास्ववियुले क्याम्पस प्रशासन र निर्वाचन समितिलाई २०८१ चैत्र ६ गते दिउँसो ३ बजेसम्म क्याम्पस गेटको तालाबन्दी खोल्न र विद्यार्थीको पठनपाठन सुचारु गर्न आग्रह गरेको छ। साथै, स्ववियु निर्वाचनका लागि नयाँ तालिका तुरुन्त सार्वजनिक गर्न माग गरेको छ।
यदि तोकिएको समयमा माग पूरा नभएमा अनेरास्ववियु कठोर कदम चाल्न बाध्य हुने चेतावनी दिँदै सो कार्यको सम्पूर्ण जिम्मेवारी निर्वाचन समिति र क्याम्पस प्रशासनले लिनुपर्ने बताएको छ।
यस घटनाले क्याम्पसमा विद्यार्थी राजनीति र शैक्षिक गतिविधिमा थप अस्थिरता ल्याउने चिन्ता व्यक्त गरिएको छ।
