राजनीतिक खिचातानीले दुई पटक रोकिएको पोखरास्थित पृथ्वीनारायण क्याम्पसमा स्वतन्त्र विद्यार्थी युनियन (स्वावियु) निर्वाचन आइतबार हुँदैछ ।
पृथ्वीनारायण क्याम्पस देशकै ठूलो क्याम्पस भएकाले पनि यहाँको चर्चा राष्ट्रिय स्तरमै चलेको छ । अझ भन्ने हो भने पर्वतका कमल सुवेदीले स्ववियु अध्यक्ष पदमा स्वतन्त्र उम्मेद्वारी दिएपछि चर्चा र चासो ह्वात्तै बढेको छ । क्याम्पसमा पनि सुवेदीको चर्चा चुलिँदै गएपछि दलका भातृ संगठनका उम्मेद्वारलाई टाउको दुखाईको विषय बनेको छ ।
पोखराकै अन्य क्याम्पसमा पनि स्वतन्त्र उम्मेद्वारले नै बाजी मारिरहेको अवस्थामा पिएनसीमा पनि स्वतन्त्र उम्मेद्वार कमलमाथि धेरैको नजर छ ।
यो स्ववियु निर्वाचनलाई नजिकबाट नियालिरहेका पृथ्वीनारायण क्याम्पसमै अध्ययनरत विद्यार्थी दीपक शर्मा लामो समयदेखि पृथ्वीनारायण क्याम्पसलाई राजनीतिक थलो बनाई राजनैतिक खिचातानी र अनेक बहानामा क्याम्पसमा पढाइ बन्द गर्नु, विद्यार्थीलाई सहज भन्दा झन् असहज परिस्थिति बढ्दै गएपछि स्वतन्त्रको माहोल बढ्दै गएको बताउँछन् ।
पृथ्वीनारायण क्याम्पसलाई ‘डिजिटल पिएनसी’ निर्माण गर्ने लक्ष्यका साथ निर्वाचनमा होमिएका कमल सुवेदीलाई सबै विद्यार्थीले विवेक प्रयोग गर्नुपर्ने र दलका भातृ संस्थाका नेतालाई पाठ सिकाउनुपर्ने शर्माले जोड छ ।
यता, स्वतन्त्र उम्मेद्वार कमल सुवेदीले पृथ्वीनारायण क्याम्पस राजनीतिक क्रीडास्थल बन्दै गएकाले आफू टुलुटुलु हेरेर बस्न नसकेको बताउँछन् । शैक्षिक क्षेत्रमा विद्यार्थीको हितका लागि स्वतन्त्र व्यक्तिले नै काम गर्न सक्ने भएकाले आफू चुनावी मैदानमा उत्रिएको उनी बताउँछन् । क्याम्पसमा मेरिटोक्रेसी लागू हुर्नुपर्ने उनको जोड छ ।
२०७४ सालदेखि अनवरत क्याम्पसमा रहेका सुवेदी हाल स्नातकोत्तरतर्फ राजनीतिक शास्त्र र स्नातकतर्फ कानूनका विद्यार्थी हुन् । उनी निरन्तर विद्यार्थीका समस्या समाधानका लागि लड्दै आइरहेका छन् ।
दलका भातृ संगठनविहीन क्याम्पस निर्माणको आफ्नो मुख्य मुद्दा भएको भन्दै उनले सीपमूलक, व्यावसायिक र अनुसन्धानमूलक शिक्षा बनाउन, क्याम्पसमा हुने दलीय राजनीति हस्तक्षेप र भागबण्डाको अन्त्य गरी मेरिटोक्रेसी लागू गर्न, नवविचार, नैतिकता, नवप्रवर्तनसहितको शिक्षाका लागि आफू चुनावी मैदानमा उत्रिएको बताए ।
शिक्षा क्षेत्रका विकृति-विसंगति, अस्त व्यस्तता र अन्योलता हटाउन, भलिबल, फुटबल, क्रिकेट र बास्केटबललगायत सम्पूर्ण खेलप्रेमीका लागि खेलकुद एकेडेमी स्थापना, आर्थिक, असाह्य, विपन्न र दूरदराजबाट आउने विद्यार्थीका लागि सुविधासम्पन्न अपांगमैत्री छात्र/छात्रावास निर्माण गर्न र क्याम्पसलाई शैक्षिक थलोका साथै नवीनता र अनुसन्धानको हब बनाउन प्रयास गर्ने सुवेदीको प्रतिवद्धता छ ।
पर्वत निवासी सुवेदी क्याम्पसभित्र जोशिलो युवाका रुपमा परिचित छन् । दलीय संगठन नरुचाउने विद्यार्थीको संख्या निकै धेरै रहेकाले आफूले सहजै चुनाव जित्ने सुवेदीको आकलन छ ।
पृथ्वीनारायण क्याम्पसमा आइतबार बिहान ८ बजेदेखि स्ववियु निर्वाचन हुँदैछ । क्याम्पसमा नौ हजार दुई सय ७० विद्यार्थी स्ववियु निर्वाचनमा सहभागी हुँदैछन् । समयमै मतदान स्थलमा आएर ‘हाम्रो भन्दा पनि राम्रो’ व्यक्तिलाई मतदान गरिदिनुहुन उनले सबै विद्यार्थीलाई अनुरोध गरेका छन् ।
