पोखरा, कास्की — आगामी २०८२ मा पोखराको लेकसाइडस्थित वाराहीघाटमा आयोजना गर्न लागिएको गण्डकी कोटिहोम महायज्ञको स्थान परिवर्तन गरिएको छ। मानव सेवा फाउन्डेसनको आयोजनामा हुने यो महायज्ञ पोखरा १७ स्थित सदा शिवजी सिद्धेश्वर हरिहर मन्दिरको गुठीको जग्गामा आयोजना हुने भएको छ।
गत फागुन २३ गते वाराहीघाटमा महायज्ञ स्थलको भूमि पूजन गर्ने क्रममा पोखरा महानगरपालिकाका नगरप्रहरीले भूमि पूजन रोक्न खोजेपछि दुवै पक्षबीच विवाद उत्पन्न भएको थियो। यसपछि फागुन २६ गते पोखरा महानगरपालिकाका मेयर धनराज आचार्यको आह्वानमा भएको बैठकले वैकल्पिक स्थानमा महायज्ञ सञ्चालन गर्ने निर्णय गरेको थियो।
समस्या समाधान समितिले उपयुक्त वैकल्पिक स्थानको खोजी गरी पोखरा महानगरपालिका वडा नं. १७ स्थित सदा शिवजी सिद्धेश्वर हरिहर मन्दिरको गुठीको जग्गामा महायज्ञ आयोजना गर्ने निर्णय गरेको हो। यस स्थानमा आसपासका स्थानीयको जमिन भाडामा लिएर महायज्ञ सञ्चालन हुने बताइएको छ।
महायज्ञको तयारी तीव्र रूपमा अघि बढिरहेको छ। महायज्ञका संकल्पकर्ता विजय श्रीकृष्ण मूर्तीसामु आमा समूह, टोल विकास समिति तथा स्थानीय संघसंस्थाका प्रतिनिधिहरूले ऐक्यबद्धता जनाएका छन्। पोखरा महानगरपालिका, जिल्ला प्रशासन कार्यालय कास्की र स्थानीय व्यवस्थापन समितिले महायज्ञ सञ्चालनको लागि अनुमति दिइसकेका छन्।
हाल आयोजक मानव सेवा फाउन्डेसन नेपाल महायज्ञको तयारीमा जुटेको छ। यद्यपि, महायज्ञ आयोजनासँग सम्बन्धित केही विवादहरू अदालतमा विचाराधीन रहेको र मिलापत्र प्रक्रिया बाँकी रहेको जनाइएको छ।
