पोखरा: कास्कीको मादी गाउँपालिकाले पालिका स्थापना दिवसको अवसरमा फागुन २७ देखि २९ गतेसम्म खुल्ला वडास्तरीय पुरुष भलिबल प्रतियोगिता सञ्चालन गर्ने भएको छ।
मादी गाउँपालिकाले आज पोखरामा पत्रकार सम्मेलन गर्दै पालिका स्थापना दिवसको अवसरमा आयोजना हुने कार्यक्रमबारे जानकारी दिएको हो। गाउँपालिकाका अध्यक्ष देवीजंग गुरुङले कार्यपालिकाको निर्णयअनुसार विभिन्न कार्यक्रम आयोजना गरिने बताए।
“पालिकाको पर्यटकीय र धार्मिक क्षेत्रहरूको प्रचारप्रसार साथै संस्कृति आदानप्रदान गर्ने उद्देश्यले माघ १५ गते बसेको बैठकले पालिका स्थापना दिवसको अवसरमा दोस्रो अध्यक्ष कप भलिबल प्रतियोगिता आयोजना गर्ने निर्णय गरेको छ,” अध्यक्ष गुरुङले भने, “प्रतियोगिता फागुन २७ देखि २९ गतेसम्म मादी गाउँपालिका–३, याङ्जाकोटमा सञ्चालन हुनेछ।”
उनका अनुसार पहिलो संस्करणको अध्यक्ष कप भलिबल प्रतियोगिता पालिकास्तरीय भए पनि दोस्रो संस्करण खुल्ला वडास्तरीय पुरुष भलिबल प्रतियोगिता हुने छ। प्रतियोगिताको विजेताले २ लाख रुपैयाँ पुरस्कार, उपविजेताले १ लाख रुपैयाँसहित ट्रफी, मेडल र प्रमाणपत्र प्राप्त गर्नेछन्। साथै, विधागतर्फ उत्कृष्ट खेलाडीलाई पनि नगद पुरस्कार प्रदान गरिनेछ। प्रतियोगितामा सहभागिताका लागि एक टिमलाई ३ हजार ५ सय रुपैयाँ शुल्क निर्धारण गरिएको छ।
पालिका स्थापना दिवसको अवसरमा सामुदायिक विद्यालयमा कार्यरत शिक्षकहरूबीच हाजिरी जवाफ प्रतियोगिता समेत आयोजना गरिनेछ। यस प्रतियोगितामा प्रथम हुनेले २० हजार, द्वितीय हुनेले १५ हजार र तृतीय हुनेले १० हजार रुपैयाँ पुरस्कार प्राप्त गर्नेछन्।
त्यस्तै, प्रतियोगिता अवधिभर होमस्टेमा १ हजार रुपैयाँको विशेष प्याकेज रहने जानकारी पनि गाउँपालिकाले दिएको छ।
