पोखरा, भदौ १३ – राष्ट्रिय फलफूल तथा तरकारी थोक व्यवसायी संघ पोखराले आफ्नो २२औं स्थापना दिवसको अवसरमा पोखरा–१४ स्थित शहीद स्मृति आवासीय माध्यमिक विद्यालयलाई खेलकुद सामग्री, शैक्षिक सामग्री तथा खाद्यान्न वितरण गरेको छ ।
संघका अध्यक्ष दुर्गाप्रसाद कंडेल, उपाध्यक्ष तथा कार्यक्रम संयोजक हरिकृष्ण मैनालीसहित पदाधिकारी, सदस्य तथा सल्लाहकारहरूले आइतबार विद्यालयका प्रधानाध्यापक कल्पना चिलवाललाई सामग्री हस्तान्तरण गरेका हुन् ।
कार्यक्रममा संघका सल्लाहकार निर्मलप्रसाद बास्तोलाले शिक्षा राष्ट्र निर्माणको आधार भएकाले विद्यालयको स्तर उकास्न समाज, संस्था र व्यक्तिको संयुक्त योगदान अपरिहार्य हुने बताए । उनले यस किसिमको सहयोगले विद्यार्थीलाई थप उत्साह र प्रोत्साहन प्रदान गर्ने विश्वास व्यक्त गरे ।
संघ अध्यक्ष कंडेलले शिक्षा बिना समाजले दिगो प्रगति गर्न नसक्ने भन्दै सहयोगलाई संघको सामाजिक उत्तरदायित्वको हिस्सा भएको उल्लेख गरे । उनले गुणस्तरीय शिक्षा, दक्ष शिक्षक र सिर्जनशील विद्यार्थी उत्पादनमा संघ निरन्तर सहयोग गर्ने प्रतिबद्धता जनाए ।
प्रधानाध्यापक चिलवालले विद्यालयमा शहीद, बेपत्ता, सीमान्तकृत, अपांग र दलितलगायत ३८६ विद्यार्थी अध्ययनरत रहेको जानकारी दिँदै संघको सहयोगले विद्यालय र विद्यार्थीलाई ठूलो ऊर्जा र प्रेरणा प्रदान गरेको बताइन् ।
संघ अध्यक्ष कंडेलको अध्यक्षतामा सम्पन्न कार्यक्रममा सहायक प्रधानाध्यापक राजीव सिग्देलले स्वागत मन्तव्य राखेका थिए भने संघका सचिव लालप्रसाद ढकालले कार्यक्रम सञ्चालन गरेका थिए ।
