पोखरा । पोखराको सिमलचौरमा रहेको लिटिल स्टेप माध्यमिक विद्यालयले विकासको नयाँ अध्याय सुरु गरेको छ । २०३९ सालदेखि शैक्षिक क्षेत्रमा योगदान दिँदै आएको यस विद्यालयमा अन्तर्राष्ट्रिय अनुभव र आधुनिक सोच बोकेको नयाँ व्यवस्थापन टोली भित्रिएको हो ।
नयाँ टोलीमा शिक्षाविद् पदम बास्तोकोटी, गण्डकी विश्वविद्यालयका संस्थापक रजिस्ट्रार डा कैलाश तिमिल्सिना , राजनीतिशास्त्र तथा भूगोलशास्त्रमा स्नातकोत्तर अध्ययन गरेका, विज्ञान संकायबाट बीएस्सी उत्तीर्ण तथा विभिन्न अभियानमा अनुभव हासिल गरेका प्राविधिक व्यक्तित्व मिलन पौडेल ,विदेशमा अध्ययन गरेर फर्किएका युवा शिक्षा व्यवसायीहरू सामेल छन् ।
लामो समयदेखि विद्यालयको नेतृत्व सम्हालेका संस्थापक अध्यक्ष शेर बहादुर गुरुङ र प्रिन्सिपल पम्फा गुरुङले नयाँ टोलीलाई जिम्मेवारी सुम्पिएका हुन् ।जिम्मेवारी हस्तान्तरण गर्न पाउँदा खुसी व्यक्त गर्दै संस्थापक अध्यक्ष गुरुङ र प्रिन्सिपल गुरुङले भने, ‘विद्यालयलाई नयाँ उचाइमा पुर्याउने उत्साही टोली आएकोमा हामीलाई गर्व छ, आगामी दिनमा पनि हाम्रो मार्गनिर्देशन रहिरहनेछ ।’ अब पुरानो व्यवस्थापन टोली एडभाइजरको भूमिकामा रहने बताइएको छ ।
उनीहरूको अनुभव र संस्थागत स्मृतिले नयाँ टोलीलाई मार्गदर्शन गर्ने विश्वास लिइएको छ नयाँ व्यवस्थापनले शिक्षण पद्धतिमा आमूल परिवर्तनको योजना अघि सारेको छ । विद्यालयले अबको शिक्षालाई ‘परीक्षा केन्द्रित’ भन्दा पनि ‘जीवन केन्द्रित’ बनाउने लक्ष्य राखेको छ । ‘लर्न बाई डुइङ’ र ‘स्किल बेस्ड लर्निङ’ जस्ता अवधारणालाई प्राथमिकता दिँदै कम्प्युटरमा आधारित शिक्षण, डिजिटल कक्षा, इन्टरप्रेन्योरसिप र खेलकुदलाई पाठ्यक्रमसँग एकीकृत गरिने तयारी भइरहेको छ ।
यसले विद्यार्थीलाई सैद्धान्तिक ज्ञानमा मात्र सीमित नराखी व्यावहारिक सीप, नेतृत्व क्षमता र आत्मनिर्भरता विकासतर्फ उन्मुख गराउने लक्ष्य राखेको छ ।पोखराका उत्कृष्ट इन्फ्रास्ट्रक्चर भएका विद्यालयमध्येको एक मानिने लिटिल स्टेपले हालसम्म १०० भन्दा बढी डाक्टर, इन्जिनियर, आइटी अफिसर तथा राजनीतिज्ञ उत्पादन गरिसकेको छ । फराकिला कक्षाकोठा, आधुनिक प्रयोगशाला, व्यवस्थित पुस्तकालय र खेलमैदान रहेको यस विद्यालयले चार दशकभन्दा लामो इतिहासमा हजारौँ अनुशासित र जिम्मेवार नागरिक तयार पारेको छ ।
इतिहासको मजबुत आधार, अनुभवी मार्गदर्शन र आधुनिक दृष्टिकोणको संयोजनले लिटिल स्टेपले शिक्षा क्षेत्रमा नवप्रवर्तन र उत्कृष्टताको नयाँ मापदण्ड स्थापित गर्ने विश्वास पोखरेली समाजले गरेको छ । विद्यालय प्रशासनका अनुसार विद्यार्थीलाई विश्वस्तरमा प्रतिस्पर्धी बनाउन नयाँ टोलीले विशेष योजनाका साथ काम गर्नेछ ।
