हिजोसम्म विश्वकै सबैभन्दा प्रदूषित शहरको सूचीमा पहिलो स्थानमा रहेको काठमाडौँ उपत्यकाको वायु प्रदूषणमा आज केही सुधार आएको छ। बुधबार दिउँसोदेखि सुरु भएको छिटपुट वर्षा र गएराति तथा आज बिहान परेको पानीसँगै चलेको सामान्य हावाहुरीले उपत्यकाको वायुमण्डल सफा बनाएको हो।
प्राकृतिक कारणले वायुमण्डलमा रहेको धुलो, धुवा तथा हानिकारक कणहरू हटाउँदा काठमाडौँको वायु प्रदूषणको स्तर घटेको देखिएको छ। यसैको परिणामस्वरूप आज काठमाडौँ प्रदूषित शहरहरूको सूचीमा पहिलो स्थानबाट झरेर १० औँ स्थानमा पुगेको छ।
वायु प्रदूषणको यस्तो सुधार अस्थायी भए पनि यसले तत्कालका लागि जनस्वास्थ्यमा राहत पुर्याएको छ। वातावरणविद्हरूले भने दीर्घकालीन समाधानका लागि नीतिगत तथा संरचनागत सुधारमा ध्यान दिनुपर्ने सुझाव दिएका छन्।
