पोखरा – लेकसाइड मदिरा व्यवसायी समितिका अध्यक्ष रोसन देवकोटाले मदिरा व्यवसायीहरूको हकहितका लागि निरन्तर संघर्ष गर्दै आएको बताएका छन्। करिब १० वर्षदेखि मदिरा व्यापारमा सक्रिय रहेका देवकोटा व्यवसायी समितिमा साधारण सदस्य हुँदै अध्यक्ष पदसम्म पुगेका हुन्।
देवकोटाका अनुसार उनले व्यवसाय सञ्चालनका क्रममा रक्तदान, गजल वाचन, ताल सरसफाइ, प्रहरी समन्वय तथा अन्य सामाजिक सेवाहरूमा समेत योगदान दिएका छन्। व्यवसायीहरूलाई विभिन्न समस्याहरू पर्दा प्रशासन र अन्य निकायहरूसँग समन्वयकारी भूमिका निर्वाह गर्दै आएको उनले बताए।
लेकसाइड क्षेत्रमा करिब १५० मदिरा पसल सञ्चालनमा रहेका छन्। सुरुवाती दिनहरूमा प्रशासनले राति १० बजेपछि पसल बन्द गर्न निर्देशन दिने गरेको थियो, जसका विरुद्ध व्यवसायीहरू पटक–पटक प्रशासनसँग समन्वयका लागि धाएको उनले स्मरण गरे। मदिरा व्याबसाय संघसँग कास्कीको सहयोग माग्दा उपेक्षा भएको गुनासो गर्दै उनले व्यवसायीहरूका हकहितका लागि आफूहरू संगठित भएर संघर्ष गरिरहेको उल्लेख गरे।
नेपाल मदिरा व्यवसायी महासंघसँग पनि संस्था दर्ताका लागि हारगुहार गर्दा असहयोग भएको भए पनि अन्ततः आफूहरूले संस्था दर्ता गरेर व्यवसायीहरूको हितका लागि काम गर्न सफल भएको देवकोटाले बताए। हाल समितिले लेकसाइडका मदिरा व्यवसायीहरूको समस्या समाधान तथा अधिकार सुनिश्चित गर्न निरन्तर लागिपरेको उनको भनाइ छ।
