लेखनाथ उद्योग वाणिज्य संघको १५औं महाधिवेशन तथा २९औं साधारण सभा भाद्र २० र २१ गते भव्य रूपमा आयोजना हुँदैछ। “१ कार्यकाल – १ महोत्सव” भन्ने नाराका साथ अगाडि बढाइएको यस महाधिवेशनमा व्यवसाय र संस्कृतिको समन्वयलाई प्रमुख अभियानको रूपमा अघि सारिएको छ।
संघका अध्यक्ष पदका उम्मेदवार राजेन्द्र ओझाले व्यवसायी तथा सर्वसाधारणको व्यापक सहभागितासहित कार्यक्रमलाई ऐतिहासिक बनाउने तयारी गरिएको जानकारी दिनुभयो। उहाँले किराना, फेन्सी, सिरक डसना, भाडा पसल लगायत साना-ठूला सम्पूर्ण व्यवसायीलाई प्रत्यक्ष टेवा पुग्ने कार्यक्रम तथा योजनाहरू अघि सार्ने प्रतिबद्धता व्यक्त गर्नुभएको छ।
स्थानीय उत्पादन र व्यवसायलाई प्राथमिकता दिने, लेखनाथ क्षेत्रको संस्कृति तथा चाडपर्वलाई परिष्कृत गर्दै व्यवसायीलाई प्रत्यक्ष लाभ दिलाउने र सांस्कृतिक पर्यटन प्रवर्द्धनमार्फत लेखनाथलाई व्यापारिक केन्द्रको रूपमा स्थापित गर्ने लक्ष्यसहित कार्यक्रमहरू तय गरिएको छ।
“संघ व्यवसायीको साझा घर हो, र महोत्सव त्यसको प्रत्यक्ष प्रमाण हो,” अध्यक्ष उम्मेदवार ओझाले भन्नुभयो। उहाँले भाद्र २० र २१ गते हुने निर्वाचनमा आफूलाई अध्यक्ष पदमा विजयी गराइदिन सम्पूर्ण व्यवसायी समुदाय, सदस्यहरू, हितधारू तथा नगरवासीहरूलाई अमूल्य साथ, सहयोग र मत दिन हार्दिक अनुरोध गर्नुभएको छ।
महाधिवेशनमा सांस्कृतिक कार्यक्रम, व्यवसाय प्रवर्द्धन मेलाहरू र स्थानीय उत्पादनको प्रदर्शनी समेत आयोजना गरिनेछ। यसले लेखनाथको व्यापारिक र सांस्कृतिक उज्जवल सम्भावनालाई अझ उचाइमा पुर्याउने अपेक्षा गरिएको छ।
