✍️अजय क्षेत्री
कास्कीमा गएराति परेको अविरल वर्षाको कारणले खसेको पहिरोमा पुरिएर एकै परिवारका सात सहित ११ जनाको मृत्यु भएको छ । तीन फरक फरक ठाउँमा पहिरोमा पुरिएर भएका घटनामा ११ जनाले ज्यान गुमाएका हुन् ।
पोखरा महानगरपालिका-१९ मा सात जना, पोखरा-३२ मा तीन जना र मादी गाउँपालिका-११ मा एक जनाको मृत्यु भएको कास्की प्रहरीले जनाएको छ ।
पोखरा-१९ को घटनामा परेर ४७ वर्षीय कुलबहादुर परियार, श्रीमती ४३ वर्षीया मनकुमारी परियार, ८५ वर्षीया आमा लक्षिमा परियार, २० वर्षीया प्रभा परियार, छोरी १५ वर्षीय प्रशना परियार (विवाहित) र ज्वाइँ २५ वर्षीय अस्मित परियार र ५६ वर्षीय राधिका परियारको मृत्यु भएको हो ।
घटनामा राधिकाका छोरा ४० वर्षीय कुमार परियार र कुलबहादुरका छोरा १७ वर्षीय पवन परियार घाइते भएका छन् । उनीहरू अस्पतालबाट डिस्चार्ज भएका छन् ।
त्यस्तै, पोखरा-३२ चैनपुर बाह्रबिसेमा ४० वर्षीय आरती ओझाको घर भत्किँदा तीन जनाको मृत्यु भएको छ । उनका छोरीहरू १८ वर्षीय अनिता, ११ वर्षीय अनुष्का ओझा र आरतीका दाइका छोरा ९ वर्षीय प्रतिक सुवेदीले ज्यान गुमाए । आरतीको भने पश्चिमाञ्चल क्षेत्रीय अस्पतालमा उपचार भैरहेको छ ।
मादी-११ तल्लो ताप्लेमा भएको घटनामा ८० वर्षीया माइतीकुमारी गुरुङको मृत्यु भएको छ । घरमा छोरासहित बस्दै आएकी कुमारीको बिहान एक बजे खसेको पहिरोमा पुरिएर ज्यान गएको हो । उनका छोरा ५५ वर्षीय ओमबहादुर गुरुङको भने उद्दार गरिएको छ ।
