पोखरा — पोखराका युवा व्यवसायी दुर्गाप्रसाद हुमागाईं लायन्स इन्टरनेसनल डिस्ट्रिक्ट ३२५ के नेपालको लायन वर्ष २०२५–०२६ का लागि डिस्ट्रिक्ट गभर्नरमा निर्वाचित भएका छन्। शनिबार पोखरामा सम्पन्न तेस्रो वार्षिक डिस्ट्रिक्ट कन्भेन्सनले उनलाई गभर्नर चयन गरेको हो।
सोही निर्वाचनमा रमेश अधिकारी फस्ट भाइस डिस्ट्रिक्ट गभर्नर र विष्णुहरि फुँयाल सेकेन्ड भाइस डिस्ट्रिक्ट गभर्नर पदमा विजयी भएका छन्।
२० वर्षदेखि लायन्स क्लबमा सक्रिय हुमागाईं लायन्स क्लब अफ पोखरा पिस चौतारीका पूर्व अध्यक्षसमेत हुन्। उनी समाजसेवी तथा युवा सञ्चार उद्यमीका रूपमा परिचित छन्। काभ्रे जिल्लाको पनौती नगरपालिका, कुशादेवीमा जन्मिएका हुमागाईं २५ वर्षअघि पोखरामा आएर व्यवसायिक क्षेत्रमा सक्रिय भएका थिए।
गभर्नरमा निर्वाचित भएपछि हुमागाईं र डिस्ट्रिक्ट फस्ट लेडी सरिता दाहाल हुमागाईंले अग्रज लायन लिडर तथा सम्पूर्ण लायनहरूलाई आभार व्यक्त गर्दै धन्यवाद दिएका छन्। हुमागाईंले लायन वर्ष २०२५–०२६ लाई स्मरणीय बनाउने प्रतिबद्धता व्यक्त गरेका छन्।
