पोखराको बुद्धचोकस्थित टप्स माध्यमिक विद्यालयको प्राचार्यमा डा. झपिन्द्र अधिकारी पदस्थापित भएका छन् । एक विशेष कार्यक्रमका बिच शुक्रबार उनको पदस्थापना गरियो ।
नवनियुक्त प्राचार्य डा. अधिकारी रसायनशास्त्र (केमेस्ट्री) का वरिष्ठ शिक्षाविद् हुन् । त्रिभुवन विश्वविद्यालयबाट एम.एस्सी.गरेका उनले जापानको सागा विश्वविद्यालयबाट पिएचडी गरेका छन् । उनीसंग गण्डकी बोर्डिङ स्कुलमा २२ वर्ष प्रशासनिक तथा अध्यापन गराएको अनुभव छ । साथै देश तथा विदेशका सेमिनारहरुमा सहभागिता जनाएका छन् ।
पदस्थापना कार्यक्रममा बोल्दै नवनियुक्त प्राचार्य डा. अधिकारीले आफ्नो जिम्मेवारी इमान्दारिताका साथ निभाउने प्रतिबद्धता जनाए । विद्यालयलाई उत्कृष्ट शैक्षिक संस्थाका रूपमा स्थापित गर्ने उनको उद्घोष थियो ।
कार्यक्रमको अध्यक्षता गरेका टप्स एजुकेशन फाउन्डेशनका अध्यक्ष बलबहादुर थापाले अभिभावक र विद्यार्थीको चाहना अनुसार विद्यालयलाई उत्कृष्ट शैक्षिक गन्तव्य बनाउने बताए । अधिकारीको नेतृत्वमा विद्यालयले शैक्षिक गुणस्तर, अनुशासन, नवप्रवर्तन र विद्यार्थीमैत्री वातावरणलाई थप मजबुत बनाउँदै लग्ने उनको भनाई थियो । फाउन्डेशनका सचिव रमेश थापाले सञ्चालन गरेको कार्यक्रममा एकेडेमिक डीन भलबहादुर क्षेत्रीले स्वागत तथा प्राइमरी इन्चार्ज पद्मा पराजुलीले प्राचार्यको परिचय गराएका थिए ।
नयाँ व्यवस्थापनका साथ सञ्चालनमा आएको टप्स माध्यमिक विद्यालयले पूर्वाधार र गुणस्तर सुधारमा ६० करोड रुपैयाँभन्दा बढी लगानी गरिसकेको छ । १० रोपनी क्षेत्रफलमा फैलिएको विद्यालयमा हाल नर्सरीदेखि कक्षा १२ सम्म १,६०० विद्यार्थी अध्ययनरत छन् । विद्यालयमा कक्षा ११ र १२ मा विज्ञान, व्यवस्थापन र होटल व्यवस्थापन संकाय सञ्चालनमा रहेका छन् ।
विद्यालयका एकेडेमिक डीन भलबहादुर क्षेत्रीले स्वागत गर्दै एकतालाई मजबुत बनाउने र विद्यालयलाई उचाईमा पुराउन थप उर्जा थपिने विश्वास व्यक्त गरे । विद्यालयकी प्राइमरी इन्चार्ज पद्मा पराजुलीले प्राचार्य अधिकारीको परिचय गराएकी थिइन् ।
विद्यालयले पछिल्लो समय विद्यालयप्रति अभिभावक र विद्यार्थीको विश्वास उल्लेखनीय रूपमा बढेको जनाएको छ । विद्यालयमा पोखराका विभिन्न प्रतिष्ठित शैक्षिक संस्थामा अनुभव हासिल गरेका दक्ष तथा समर्पित विषयगत शिक्षकहरू, समाजमा सकारात्मक छवि बनाएका पूर्वसैनिक व्यक्तित्वहरू तथा शिक्षाप्रेमीहरुको लगानी छ ।
“टप्सलाई साँच्चिकै टप्स बनाउने” लक्ष्यका साथ विद्यालयले अत्याधुनिक विज्ञान प्रयोगशाला, कम्प्युटर ल्याब, स्मार्ट तथा डिजिटल कक्षाकोठा, प्रविधिमैत्री शिक्षण प्रणाली, आधुनिक सिकाइ सामग्री तथा विद्यार्थीकेन्द्रित शिक्षण पद्धतिमा विशेष जोड दिएको छ । साथै, समृद्ध पुस्तकालय, स्वच्छ र व्यवस्थित क्यान्टिन, प्रर्याप्त खेल मैदान, अतिरिक्त क्रियाकलापका लागि आवश्यक पूर्वाधार तथा सुरक्षित, अनुशासित र प्रेरणादायी सिकाइ वातावरणलाई प्राथमिकताका साथ अघि बढाइएको छ ।
नयाँ व्यवस्थापनमा सञ्चालनमा आएको प्रारम्भिक चरणमा केही व्यवस्थापकीय चुनौती देखिए पनि तिनलाई व्यवस्थित गर्दै बिद्यालयले छोटो अवधिमै उल्लेखनीय प्रगति हासिल गरेको विद्यालयले जनाएको छ । गुणस्तरीय शिक्षा, अनुशासित वातावरण, आधुनिक पूर्वाधार, दक्ष शिक्षक, जीवनोपयोगी सीप र समग्र व्यक्तित्व विकासलाई केन्द्रमा राख्दै टप्स माध्यमिक विद्यालयले भविष्यका सक्षम, सिर्जनशील र जिम्मेवार नागरिक उत्पादन गर्ने आफ्नो अभियानलाई निरन्तर अगाडि बढाइरहेको उल्लेख गरेको छ ।