✍️ अजय क्षेत्री
जनकपुर— ठूला सपना बोकेर विदेश जान चाहने युवाहरूको समूहले नेपालमै बसेर आफ्नो क्षमताले देश र संस्कृति उचाइमा पुर्याउन सक्छ भन्ने उदाहरण प्रस्तुत गरेका छन्। अभिनास, इशिका, श्याम, र अरुण विजयको नेतृत्वमा रहेको यो समूहले विदेश जाने योजना परित्याग गरी नेपालमै कलाकारितामा नयाँ अध्याय सुरु गरेको छ।
उनीहरूले जनकपुरको नोचपुरलाई आफ्नो सिर्जनात्मक कर्मस्थल बनाउँदै, मैथिली भाषामा सन्देशमूलक “कलकतिया वाली” नामक सिरियलको निर्माण थाले। सिरियलले छोटो समयमै जनमानसमा लोकप्रियता हासिल गर्यो। सामाजिक सन्देशलाई मनोरञ्जनसँग जोडेर प्रस्तुत गरिएको यस सिरियलमा अभिनासले निभाएको “कलकतिया वाली” पात्र विशेष चर्चामा छ। “फुलो” र “आँठीबा” जस्ता पात्रहरू पनि दर्शकमाझ लोकप्रिय बनेका छन्।
कलाकारहरूको यो समूहको मेहनतले मैथिली भाषाको प्रचार मात्र गरेको छैन, बरु नेपाल र भारतका लाखौँ दर्शकहरूलाई प्रभावित गरेको छ। उनीहरूको भिडियो हेर्नेहरूको संख्या दिनहुँ बढ्दै गएको छ, जसले नेपाली युवाहरूलाई देशमै बसेर सिर्जनशील कार्यमार्फत ठूलो सफलता हासिल गर्न सकिन्छ भन्ने प्रेरणा दिएको छ।
यो सफलताले जनकपुरलाई सिर्जनात्मक केन्द्रका रूपमा स्थापित गर्न मद्दत गरेको छ, र साथसाथै, मैथिली भाषा र संस्कृतिलाई नयाँ पुस्तासम्म पुर्याउने प्रयासमा योगदान पुर्याएको छ। “कलकतिया वाली” मात्र होइन, यो समूहका सबै पात्रहरूको लोकप्रियताले देखाउँछ कि नेपालमै बसेर अन्तर्राष्ट्रियस्तरको काम गर्न सकिन्छ।
