✍️ अजय क्षेत्री
काठमाडौँ, २४ असोज – नेपालका सबै ७५३ स्थानीय तहमा बैंकिङ सेवा पुगेको छ। हालै मात्र बझाङ जिल्लाको दुर्गम साईपाल गाउँपालिकामा बैंकिङ सेवा विस्तार भएपछि यो उपलब्धि हासिल भएको हो। यससँगै नेपालभरिका सम्पूर्ण स्थानीय तहमा बैंकिङ सेवा पु¥याउने सरकारको दीर्घकालीन योजना सफल भएको छ।
साईपाल गाउँपालिका, जो नेपालकै दुर्गम र विकट क्षेत्रहरूमध्ये एक मानिन्छ, बैंकिङ सेवाको पहुँचबाट लामो समयसम्म बाहिर थियो। कठिन भौगोलिक अवस्था र सीमित पूर्वाधारका कारण बैंक स्थापना गर्न चुनौतीपूर्ण थियो। तर, सरकारले वित्तीय पहुँच विस्तारको लागि विशेष ध्यान दिँदै साईपालमा सेवा सुरू गरेको हो।
साईपाल गाउँपालिकामा बैंकको आगमनले स्थानीय नागरिकलाई आर्थिक कारोबारका लागि अब टाढा जानुपर्ने बाध्यता हटेको छ। यसले व्यवसायिक गतिविधि, व्यक्तिगत बचत, सरकारी राहत र अन्य वित्तीय सुविधाहरू प्राप्त गर्न सहजता ल्याउने अपेक्षा गरिएको छ।
यस उपलब्धिपछि नेपाल राष्ट्र बैंकले बैंकिङ पहुँचलाई अझ सुदृढ गर्दै, डिजिटल बैंकिङ सेवा र वित्तीय साक्षरता कार्यक्रमलाई पनि प्रवर्द्धन गर्ने योजना अगाडि सारेको छ। साथै, ग्रामीण र दुर्गम क्षेत्रका जनताको आर्थिक सशक्तिकरणका लागि विभिन्न सहुलियतपूर्ण कार्यक्रमहरू ल्याउने तयारी भइरहेको जानकारी दिइएको छ।
नेपाल सरकार र नेपाल राष्ट्र बैंकको यस कदमले देशको वित्तीय प्रणालीलाई समावेशी बनाउन महत्त्वपूर्ण योगदान पुर्याएको छ।
