पोखरा – प्रेस सेन्टर नेपाल गण्डकी प्रदेश समितिले प्रदेश प्रेस रजिस्ट्रार विमला भण्डारीलाई पत्रकारका हक, हित र सुरक्षासम्बन्धी विभिन्न मागहरू समेटिएको ज्ञापनपत्र बुझाएको छ।
आईतबार प्रदेश रजिस्ट्रारको कार्यालयमा पुगेर ज्ञापनपत्र बुझाउँदै समितिले पत्रकारहरूको पेशागत स्वतन्त्रता, सामाजिक सुरक्षाको ग्यारेन्टी, मिडिया हाउसहरूमा श्रम ऐनको कार्यान्वयन, र सञ्चारकर्मीमाथिको दमन र हस्तक्षेप अन्त्य गर्न आग्रह गरेको हो।
यसैक्रममा, प्रेस सेन्टर नेपालले आईतबार देशभरका सञ्चार क्षेत्र हेर्ने सम्बन्धित कार्यालय र स्थानीय प्रशासनलाई पनि ध्यानाकर्षण गराउने उद्देश्यले ज्ञापनपत्र बुझाएको केन्द्रीय कार्यालयले जानकारी दिएको छ।
केन्द्रीय प्रेस सेन्टरले देशभर सञ्चारकर्मीमाथि बढ्दो दवाव र असहज वातावरणलाई लिएर चासो व्यक्त गर्दै सरोकारवालासँग आवश्यक कदम चाल्न अपिल गरेको छ।
प्रेस सेन्टर नेपालका अनुसार पत्रकारिताको स्वतन्त्रता, निष्पक्षता र अधिकार सुनिश्चित नगरेसम्म समावेशी लोकतन्त्र सुदृढ नहुने भएकाले सम्पूर्ण तहका निकायलाई जिम्मेवार बन्नु जरुरी रहेको बताइएको छ।
