✍️ अजय क्षेत्री
नेपाल प्रिमियर लिग २०२४: आठ फ्रेन्चाइज टिमसहित नेपाली क्रिकेटको इतिहासकै ठूलो टुर्नामेन्ट
नेपाल प्रिमियर लिग (एनपीएल) २०२४ मंसिर १५ देखि पुष ६ गतेसम्म कीर्तिपुरस्थित टीयू अन्तर्राष्ट्रिय क्रिकेट मैदानमा आयोजना हुने भएको छ। नेपाल क्रिकेट संघ (क्यान)को आयोजनामा हुने यस प्रतियोगितामा नेपाली क्रिकेट इतिहासमै पहिलो पटक ८ फ्रेन्चाइज टिम सहभागी हुँदैछन्।
लिगमा विराटनगर किंग्स, जनकपुर बोल्ट्स, काठमान्डु गुर्खाज, चितवन राइनोज, पोखरा एभेन्जर्स, लुम्बिनी लायन्स, कर्णाली याक्स र सुदूरपश्चिम रोएल्सले प्रतिस्पर्धा गर्नेछन्।
प्रतियोगिता सिंगल राउण्ड रोविन आधारमा खेलाइनेछ, जसमा प्रत्येक टिमले एक-आपसमा खेल खेल्नेछन्। लिग चरणपछि प्लेअफ हुँदै विजेताको घोषणा हुनेछ। लिग चरणमा २८ खेल हुनेछन् भने प्लेअफमा दुई क्वालिफायर, एक इलिमिनेटर, र अन्तिम फाइनल खेल गरी ४ खेल हुनेछ।
उद्घाटन खेलमा विराटनगर किंग्स र जनकपुर बोल्ट्सबीच प्रतिस्पर्धा हुनेछ। एनपीएलको उत्कृष्ट नेपाली खेलाडीलाई ६२ लाख बराबरको ओमोडा ई५ कार पुरस्कारस्वरूप प्रदान गरिनेछ।
नेपाल क्रिकेटको लोकप्रियता र स्तर वृद्धि गर्ने उद्देश्यले आयोजना हुने यस लिगले देशभर क्रिकेटप्रेमीको उत्साह थप्ने विश्वास गरिएको छ।
