काठमाडौँ / टर्की — टर्कीको संसद् (Türkiye Büyük Millet Meclisi) मा नेपाली आप्रवासी श्रमिकहरूले भोगिरहेका समस्या र अमानवीय अवस्थाबारे प्रस्टसँग आवाज उठाउने टर्कीकी सांसद सेभ्दा काराका (Sevda Karaca) लाई त्यहाँ कार्यरत नेपालीहरूले हार्दिक धन्यवाद ज्ञापन गरेका छन्।
सामाजिक सञ्जालमा भाइरल बनेको एक भिडियोमा सांसद काराकाले टर्कीको संसद्मा नेपाली कामदारहरूको दयनीय अवस्था, श्रम शोषण र मानव अधिकार उल्लङ्घनका विषयमा कडा रूपमा सरकार र रोजगारदाताहरूको ध्यानाकर्षण गराएकी छिन्।
संसद्मा उठाइएका मुख्य विषयहरू:
आधुनिक दासता र श्रम शोषण: नेपालबाट ल्याइएका श्रमिकहरूलाई दैनिक १२ देखि १६ घण्टासम्म श्रममा लगाइने तर सम्झौता अनुसारको अतिरिक्त समय (ओभरटाइम) को भुक्तानी नदिइएको भन्दै उनले यसलाई “आधुनिक दासता” को संज्ञा दिएकी छिन्।
राहदानी खोसिने र बन्धक बनाइने अवस्था: टर्की पुगेलगत्तै कामदारहरूको राहदानी (पासपोर्ट) खोस्ने गरिएको र उनीहरूलाई कारखानाभित्रैका कन्टेनर वा अस्थायी टहरा (प्रि-फ्याब) मा अमानवीय अवस्थामा राखिने गरेको उनले खुलाएकी छिन्।
मध्यस्थकर्ता कम्पनीको ठगी: दलाल र मध्यस्थकर्ता कम्पनीहरूले रोजगारदाता र नेपाली श्रमिक दुवै पक्षबाट मोटो रकम असुल गरेर गैरकानुनी लाभ लिइरहेको विषय पनि उनले संसद्मा प्रस्तुत गरेकी छिन्।
स्थानीय श्रमिकमाथि परेको असर: विदेशी श्रमिकलाई कम ज्यालामा शोषण गर्दा टर्कीकै स्थानीय श्रमिकहरूले पनि रोजगारी गुमाउनुपर्ने अवस्था सिर्जना भएको तर्फ उनले संसद्को ध्यानाकर्षण गराएकी छिन्।
सांसद काराका श्रम पार्टी (EMEP) को तर्फबाट सांसद निर्वाचित भएकी हुन् र हाल जनताको समानता र लोकतन्त्र पार्टी (DEM Parti) सँगको संसदीय सहकार्यमा छिन्।
विदेशको भूमिमा आफ्नो हक, हित र न्यायका लागि टर्कीकी सांसदले संसद्मै निर्भीक रूपमा आवाज उठाइदिएकोमा टर्कीमा रहेका सम्पूर्ण नेपाली समुदायले खुसी व्यक्त गर्दै उनलाई धन्यवाद दिएका छन्। आफ्ना दुःख र समस्यालाई अन्तर्राष्ट्रिय मञ्चमा उजागर गरिदिएकोमा नेपालीहरूले उनीप्रति आभार प्रकट गरेका छन्।
